සිව් මහ නදී සයුරට එක් වුනා වේ

හිරු සඳු නැගී අවරින් බැස ගියා වේ

අම දම් සුවඳ දසතම පැතිරුනා වේ

බුදු ගුණ මහිම තුඩ තුඩ රැව් දුනා වේ

තෙරුවන් බලෙන් නිදි දන පුබුදුවන්න යි

බුදු හිමි අනුහසින් දම් ඇස ලබන්න යි

ආරද​ විරිය නිති හද තුළ රැඳෙන්න යි

පිය උරුමයේ රැකවරණය ලබන්න යි

සද්ධා සීල ශ්‍රැත චාගය පඥ්ඥා ය​

සක් දෙවිඳුත් වඳී මහ ගුණ සමුදා ය

උපේක්‍ෂාව මෙත් කරුණා මුදිතා ය​

විවරල මඟයි තෙක් බඹු අකනිට්ටා ය

ජාතිය - ජරා - මරණය පරදවන්න යි

අනිත්‍ය - දුක - අනාත්මය දකින්න යි

රාගය - ද්වේෂ - මෝහය දුරු කරන්න යි

සිල් - සමාධි - ප්‍රඥා නිති වඩන්න යි

ඉපදුන සංඛත වෙනස්ව මියෙන්න යි

හේතුවකින් හටගත් ඵල බිඳෙන්න යි

ඵල හටගත් හේතු යළි නොම සැදෙන්න යි

ලෝ දම පසක් කොට සසරින් මිදෙන්න යි

මග අරි අටැඟි වෙත ඒවා පිනැති දන න්

විමසා නුවණ සිව් අරි සත ගැනම නිති න්

සත් තිස් බෝධි ගුණ තුළ සිත නිති වඩමි න්

ලබනට සුවය නිකෙලෙස් නිවනේ පහසි න්

බැහැරින් ලද මිතුරු කළණයි සඟ රුව නේ

කතරක අතරමග හමු උල්පත ලෙසි නේ

සදහම් ස්වාක්ඛාතයි සවනත වැකු නේ

නිති නොපමා වීරිය මිස නැත අන් සර නේ

මේ ගෞතම බුද්ධ රාජ්‍යය යි!!!

සිව් මහා බුදුවරුන් පහස ලද මේ බිමේ
ද්‍රෝණයක් ධාතූන් වැඩ හිඳින මේ බිමේ
ශ්‍රී මහා බෝ රජුන් සිහිල දෙන මේ බිමේ
සදා මට දැනේවා බුදු සුවඳ මේ බිමේ

ත්‍රිපිටකය අකුරු කොට සුරැකගත් මේ බිමේ
අසූහර දහස් රහතුන් හිඳිය මේ බිමේ
පෝය දා බුදු රැසින් එළිය වන මේ බිමේ
සදා මට දැනේවා බුදු සුවඳ මේ බිමේ

සොළොස් තැන් පහස දී බුදුන් වැඩි මේ බිමේ
යමා මහ පෙළහරින් අසිරි පෑ මේ බිමේ
මිහිඳු හිමි දම් සුවඳ පැතිරවූ මේ බිමේ
සදා මට දැනේවා බුදු සුවඳ මේ බිමේ

රහත් මුනිවරුන් නිති ඇවිද ගිය මේ බිමේ
තෙරුවණේ තෙද බලැති අසිරිමත් මේ බිමේ
මිහිරි දම් අමා වැසි ඇද හැලෙන මේ බිමේ
සදා මට දැනේවා බුදු සුවඳ මේ බිමේ ෴෴෴

දුකඳුළු හෙලා නෑඹිලියට සහල් ගරන අම්මේ
නුඹෙ සෙනෙහස සුවඳ දෙදී ගෙනදෙයි සුව​ අම්මේ
දස මසක්ම​ දස දුක් විඳ ලේ කිරි පෙවු අම්මේ
යදිනෙමි වරයක් සදනට සත හට සුව අම්මේ

ආදරයේ උල්පත නුඹ නොවේය මා රාහුල පුතු
අම්මේ
මව් ගුණ සුවඳ හැමදාමත් සිහිලයි තෙදබලැතියි නුඹෙ
අම්මේ
එනමුදු ජරා මරණය ඒ හැම පරයන දුක් සයුරකි
අම්මේ
බුදු පිය උරුමය තුළ පතනෙමි රැකවරණය​ අවසර
අම්මේ

අනවරාඝතයි බියකරු සසර දුකක්මයි අඳුරුයි
අම්මේ
මරු පරදා මගෙ බුදු පියා ජයගති බෝ මැඩ මුල දුක​
අම්මේ
ඒ මඟ අම නිවන් කෙලවර සදා සැපයි නිති සොඳුරුයි
අම්මේ
දෙනවද විවරණ පුතු හට වඩිනට රහතුන් ගත් මඟ
අම්මේ

තුරුලට වී සුව විඳිමින් පමා වෙන්න බැහැ රත්තරං
අම්මේ
මේ ලද ක්‍ෂණය ගිලිහෙනු දී පරදිනු බෑ මේ සටනින්
අම්මේ
පූජා දී සසුනට සැදැහෙන් පිහිටා සරණයෙ තිසරණ
අම්මේ
මං එනතුරු ඉදිකඩ ළඟ නෙත කඳුලින් බලා නොයින්
අම්මේ....... ෴෴෴